वसमत येथील ‘श्री सरस्वती निकेतन’च्या २००४-०५ च्या बॅचचा स्नेहमेळावा संपन्न; २१ वर्षांनंतर जुन्या आठवणींना उजाळा

संपादक हरनामसिंग चव्हाण

0 196 1 minute read

वसमत:CT NEWS
संपादक हरनामसिंग चव्हाण

बालपणाच्या गमतीजमती, गुरुजनांचे मार्गदर्शन आणि शाळेच्या आवारातील प्रत्येक कोपऱ्यातील आठवणींमध्ये रमत, तब्बल २१ वर्षांनंतर जुन्या वर्गमित्र-मैत्रिणींचा अपूर्व संगम नुकताच वसमत येथे पाहायला मिळाला. येथील श्री सरस्वती निकेतन हायस्कूलच्या सन २००४-०५ सालच्या इयत्ता दहावीच्या विद्यार्थ्यांचा स्नेहसंमेलन सोहळा अत्यंत उत्साहात आणि भावूक वातावरणात पार पडला.
कार्यक्रमाची सुरुवात श्री सरस्वती देवीच्या प्रतिमेचे पूजन, दीपप्रज्वलन आणि राष्ट्रगीताने करण्यात आली. तब्बल दोन दशकांनंतर एकमेकांना भेटल्याचा आनंद सर्व माजी विद्यार्थ्यांच्या चेहऱ्यावर स्पष्ट दिसत होता. या प्रसंगी प्रत्येक माजी विद्यार्थ्याने आपला परिचय देत जुन्या शालेय जीवनातील मनोगत व्यक्त केले. केवळ या भेटीसाठी अनेक मित्र-मैत्रिणी लांबच्या अंतरावरून खास वसमत येथे आले होते. सर्वांनी एकमेकांच्या कुटुंबीयांची आस्थेने विचारपूस केली, ज्यामुळे संपूर्ण वातावरण आपुलकी आणि प्रेमाने ओतप्रोत भरून गेले होते.
या स्नेहमेळाव्यात केवळ गप्पाच रंगल्या नाहीत, तर गीतगायन आणि अंताक्षरी सारख्या मनोरंजक छोट्या कार्यक्रमांचेही आयोजन करण्यात आले होते. ‘आरोग्यम् धनसंपदा’ या उक्तीप्रमाणे बदलत्या जीवनशैलीत प्रत्येकाने स्वतःच्या वैयक्तिक आरोग्याची काळजी घेणे किती गरजेचे आहे, यावरही काही जणांनी आपले विचार मांडले.
कार्यक्रमाचे प्रास्ताविक कपिल कुलथे, आदित्य लाकुळे, शैलेश माळवटकर आणि संदीप वरवंटे यांनी केले. सूत्रसंचालन राजश्री कुलकर्णी यांनी उत्तम रीतीने केले. शेवटी विश्वजीत भोरे, शिवानंद ढोरे, ज्ञानेश महात्मे आणि एकनाथ नाहनाळे यांनी उपस्थितांचे आभार मानले.
हा कार्यक्रम यशस्वी करण्यासाठी पांडुरंग सावंत, कपिल दरक, आसावरी देशपांडे यांनी विशेष पुढाकार घेतला. त्यांना अपूर्वा पावडे, द्रोपदी नाहनाळे, पुजा दंडे, हेमा बुलबुले, अमृता कुलकर्णी, प्रतिमा गुंडाळे, माया लोखंडे, मोनिका बोबडे, शारदा कदम, दिपाली जोगेवार, गिरीश जवळेकर आणि अंकुश मात्रे यांनी मोलाचे सहकार्य केले. तब्बल २१ वर्षांनंतर झालेल्या या स्नेह मेळाव्याने जुन्या आठवणींना जागृत करत सर्वांच्या आयुष्यात आपुलकीचा एक अनमोल ठेवा निर्माण केला आहे.