वसमत येथे मंगळवारी होणार 50 फुटी रावणाचे दहण व डोळे दिपवून टाकणारी आतिषबाजी

मराठवाड्यातील दुसऱ्या क्रमांकाचा मान असलेल्या वसमतच्या ऐतिहासिक दसरा महोत्सवात यंदा रावण दहन आणि डोळे दिपवून टाकणारी आतिषबाजी; लाखो भाविकांची उपस्थिती अपेक्षित

वसमत / रामु चव्हाण 

विजयादशमी म्हणजे अधर्मावर धर्माचा, असत्यावर सत्याचा आणि अहंकारावर नम्रतेचा विजय. संपूर्ण देशभरात दसरा मोठ्या उत्साहात साजरा होतो, पण मराठवाड्यातील हिंगोली जिल्ह्यातील वसमत शहराच्या दसरा महोत्सवाची बातच काही और आहे. महाराष्ट्रात हिंगोली नंतर सर्वात मोठा आणि दुसऱ्या क्रमांकाचा दसरा म्हणून वसमतच्या सार्वजनिक दसरा महोत्सवाची ओळख आहे. या ऐतिहासिक परंपरेला यंदा २०२६ सालीही मोठ्या उत्साहात साजरे केले जाणार असून, संत नामदेव सेवाभावी संस्था, वसमत संचलित श्री सार्वजनिक नवरात्र (दसरा) महोत्सव समितीने यंदा भव्य आतिषबाजी आणि रावण दहनाचा कार्यक्रम आयोजित केला आहे.

दिनांक २० ऑक्टोबर २०२६ रोजी रात्री वसमत शहरातील जिल्हा परिषद मैदानावर हा थरारक सोहळा पार पडणार आहे. गेल्या वर्षीच्या विक्रमी गर्दीनंतर यंदा प्रशासन आणि समितीने अधिक जय्यत तयारी केली आहे.

कार्यक्रम पत्रिका काय आहे? – तीन टप्प्यात रंगणार सोहळा

समितीने जाहीर केलेल्या अधिकृत कार्यक्रम पत्रिकेनुसार हा सोहळा रात्री तीन टप्प्यांत पार पडेल.

१. रात्री ९:३० वाजता – विजेत्या स्पर्धकांचे नृत्य सादरीकरण:
नवरात्र उत्सवादरम्यान घेण्यात आलेल्या विविध सांस्कृतिक स्पर्धा, गरबा, लेझीम, आणि नृत्य स्पर्धेतील विजेत्या चमूंचे बहारदार नृत्य सादरीकरण होईल. वसमत शहरातील शालेय विद्यार्थी आणि महिला मंडळे यात सहभागी होणार आहेत.

२. रात्री १०:०० वाजता – आतिषबाजी, बक्षीस वितरण व विशेष सत्कार:
हा या रात्रीचा सर्वात मोठा आकर्षणाचा केंद्रबिंदू असेल. आकाशात रंगांची उधळण करणारी, डोळे दिपवून टाकणारी शोभेची दारू आणि आतिषबाजी केली जाणार आहे. जवळपास अर्धा तास चालणाऱ्या या आतिषबाजीसाठी खास  कारागिरांना बोलावण्यात आले आहे. यावेळी नवरात्र स्पर्धेतील विजेत्यांना मान्यवरांच्या हस्ते बक्षीस वितरण आणि शहरातील विशेष कार्य करणाऱ्या व्यक्तींचा सत्कार करण्यात येईल.

३. रात्री ११:०० वाजता – रावण दहन – मुख्य आकर्षण:
अधर्माचे प्रतीक असलेल्या ५० फुटांपेक्षा उंच रावणाच्या महाकाय पुतळ्याचे दहन केले जाणार आहे. रावणाच्या पुतळ्यात फटाके भरलेले असून, श्रीरामाच्या प्रतिकात्मक बाणाने या पुतळ्याला अग्नी दिला जातो आणि संपूर्ण परिसर “जय श्रीराम” च्या गजरात दणाणून जातो. हा क्षण पाहण्यासाठी दरवर्षी लाखो लोक गर्दी करतात.

महाराष्ट्रात दोन नंबरचा दसरा – वसमतचा इतिहास काय?

वसमतचा दसरा फक्त एक सण नाही, तर ती एक परंपरा आहे. सुमारे चार दशकांपासून  येथे सार्वजनिक दसरा महोत्सव साजरा केला जातो.  या ठिकाणी दसऱ्याला मोठी जत्रा भरते. संत नामदेव सेवाभावी संस्थेने गेल्या काही दशकांपासून या उत्सवाची धुरा सांभाळली असून, त्याला एक शिस्तबद्ध आणि भव्य स्वरूप दिले आहे.

हिंगोलीच्या दसऱ्यानंतर  सर्वात मोठा रावणाचा पुतळा, आणि सर्वात जास्त गर्दीचा विक्रम वसमतच्या नावावर आहे. यामुळे या उत्सवाला महाराष्ट्रातील दोन नंबरचा दसरा असे म्हटले जाते. दसऱ्याच्या दिवशी सकाळपासूनच वसमत शहरात सीमोल्लंघन, पालखी सोहळा, आणि सायंकाळी रावण दहन अशी परंपरा आहे.

प्रशासन सज्ज, चोख बंदोबस्त

लाखो लोकांच्या गर्दीच्या पार्श्वभूमीवर वसमत पोलीस प्रशासन आणि नगरपरिषद प्रशासनाने कंबर कसली आहे. ठिकठिकाणी सीसीटीव्ही, पार्किंग व्यवस्था, पिण्याच्या पाण्याची व्यवस्था आणि अग्निशमन दलाची गाडी तैनात करण्यात येणार आहे.

या संपूर्ण महोत्सवाचे नेतृत्व सौ. सुनीता मनमोहन बाहेती (नगराध्यक्ष तथा अध्यक्ष, सार्वजनिक दसरा महोत्सव समिती, वसमत) आणि श्री. शिवदास नारायण बोड्डेवार (चेअरमन – शिवेश्वर नागरी सहकारी बँक तथा कार्याध्यक्ष, सार्वजनिक दसरा महोत्सव समिती, वसमत) हे करत आहेत.

समितीने वसमत शहरातील व परिसरातील सर्व नागरिकांनी, भाविकांनी या ऐतिहासिक आणि नेत्रदीपक सोहळ्याचा अवश्य लाभ घ्यावा, असे नम्र आवाहन केले आहे.