धक्कादायक! शिरडशहापूर येथील ‘गणपती पेट्रोलियम’वर CNG ग्राहकांची लूट आणि अरेरावी; तासनतास लाईनमध्ये उभे राहूनही ‘वशिलेबाजीने’ गॅस वाटप!
संपादक हरनामसिंग चव्हाण
धक्कादायक! शिरडशहापूर येथील ‘गणपती पेट्रोलियम’वर CNG ग्राहकांची लूट आणि अरेरावी; तासनतास लाईनमध्ये उभे राहूनही ‘वशिलेबाजीने’ गॅस वाटप!
शिरडशहापूर (ता. औंढा नागनाथ, जि. हिंगोली):
शिरडशहापूर येथील गणपती पेट्रोलियम (हिंदुस्तान पेट्रोलियम) पंपावर सध्या ग्राहकांची मोठी कोंडी आणि कर्मचाऱ्यांची अरेरावी चव्हाट्यावर आली आहे. इंधनाचे दर गगनाला भिडलेले असताना, सर्वसामान्य वाहनधारक पर्यायी मार्ग म्हणून CNG चा वापर करत आहेत. मात्र, या पंपावरील मुजोर कर्मचाऱ्यांमुळे ग्राहकांना प्रचंड मानसिक आणि शारीरिक त्रासाला सामोरे जावे लागत असल्याचा संतापजनक प्रकार समोर आला आहे.
मुख्य बातमी आणि ग्राहकांचे आरोप:
तासनतास रांगेत उभे राहूनही मिळेना न्याय:
CNG भरण्यासाठी वाहनधारक उन्हातान्हात तासनतास लाईनमध्ये उभे राहतात. मात्र, जेव्हा त्यांचा नंबर येतो, तेव्हा प्रामाणिकपणे रांगेत उभे असलेल्या गाड्यांना डावलून ‘मागच्या दाराने’ आलेल्या किंवा ओळखीच्या दुसऱ्या गाड्यांना थेट (Direct) CNG भरून दिला जातो, असा गंभीर आरोप संतप्त ग्राहकांनी केला आहे.
कर्मचाऱ्यांची दादागिरी आणि अरेरावी:
या पक्षपातीपणाबद्दल जेव्हा रांगेतील ग्राहकांनी जाब विचारण्याचा प्रयत्न केला, तेव्हा पंपावरील कर्मचाऱ्यांनी नम्रपणे उत्तर देण्याऐवजी ग्राहकांना अरेरावीची भाषा करत थेट हुज्जत घातली. ग्राहकांशी अत्यंत उद्धटपणे वर्तन केले जात असल्याच्या तक्रारी वाढल्या आहेत.
तक्रार करायची कुठे? मालकाचा नंबर देण्यास नकार!
कर्मचाऱ्यांच्या या मनमानी कारभाराची तक्रार पंपाच्या व्यवस्थापनाकडे किंवा मालकाकडे करण्यासाठी जेव्हा काही जागरूक ग्राहकांनी पंप चालक/मालकाचा मोबाईल नंबर मागितला, तेव्हा कर्मचाऱ्यांनी तो देण्यास चक्क नकार दिला. ‘तुम्हाला काय करायचे ते करा’ अशा अविर्भावात तक्रार दडपण्याचा प्रयत्न कर्मचाऱ्यांकडून केला जात आहे.
थेट सवाल: सामान्य ग्राहकांच्या वेळेची आणि पैशांची काही किंमत नाही का? वरिष्ठ प्रशासन आणि संबंधित कंपनी या मुजोर कर्मचाऱ्यांवर आणि पंपावर काय कारवाई करणार, याकडे आता सर्वांचे लक्ष लागले आहे.
