वसमत येथील महात्मा गांधी विद्यालयात १९९८ च्या माजी विद्यार्थ्यांचा स्नेहसंमेलन मेळावा उत्साहात संपन्न!

वसमत येथील महात्मा गांधी विद्यालयात १९९८ च्या माजी विद्यार्थ्यांचा स्नेहसंमेलन मेळावा उत्साहात संपन्न!

वसमत (प्रतिनिधी):
स्थानिक कौठा रोड येथील महात्मा गांधी विद्यालयातील सन १९९८ च्या दहावीच्या माजी विद्यार्थ्यांचा भव्य स्नेहसंमेलन मेळावा रविवारी (दि. २४ मे २०२६) अत्यंत उत्साहात, आनंदात आणि भावूक वातावरणात पार पडला. तब्बल २८ वर्षांनंतर एकत्र आलेल्या या मित्रांच्या मेळाव्याला ३६ माजी विद्यार्थी आणि १६ माजी विद्यार्थिनी उपस्थित होत्या. हा सोहळा महात्मा गांधी विद्यालय आणि अंकिता लॉन्स अशा दोन सत्रांत संपन्न झाला.
पहिले सत्र: शाळेच्या मैदानात आठवणींना उजाळा आणि वृक्षारोपण
कार्यक्रमाचे पहिले सत्र सकाळी ८ ते १० या वेळेत महात्मा गांधी विद्यालय, कौठा रोड येथे पार पडले. या सत्राच्या अध्यक्षस्थानी महात्मा गांधी विद्यालयाचे अध्यक्ष श्री. रामचंद्र बागल हे होते, तर प्रमुख पाहुणे म्हणून श्री. विकास म्हस्के सर उपस्थित होते. तसेच शाळेतील इतर शिक्षकवृंद व कर्मचारी वर्ग या प्रसंगी उपस्थित होता.
यावेळी बोलताना शिक्षकांनी सांगितले की, “शाळेतील कठोर शिस्त, ज्ञान आणि संस्कार यांच्याच बळावर आज या शाळेचे माजी विद्यार्थी विविध उच्च पदांवर कार्यरत आहेत, याचा आम्हाला सार्थ अभिमान आहे.” जुन्या आठवणींना उजाळा देत संपूर्ण वातावरण भारावून गेले होते. या प्रसंगी माजी विद्यार्थ्यांच्या वतीने शाळेला एक ‘Sound Mixer’ (ध्वनी मिक्सर) भेट म्हणून देण्यात आला. तसेच शाळा प्रशासनाच्या सहकार्याने शिक्षक आणि माजी विद्यार्थ्यांनी मिळून शाळेच्या मैदानात वृक्षारोपण केले.
दुसरे सत्र: शिक्षकांचा सत्कार आणि खेळांचा जल्लोष
स्नेहसंमेलनाचे दुसरे सत्र सकाळी ११ ते संध्याकाळी ६ या वेळेत ‘अंकिता लॉन्स’ येथे पार पडले. या सत्रात माजी विद्यार्थ्यांनी आपल्या लाडक्या शिक्षकांचा शाल आणि पुष्पगुच्छ देऊन भावपूर्ण सत्कार केला आणि त्यांचे आशीर्वाद घेतले. दुपारच्या सत्रात माजी विद्यार्थी आणि विद्यार्थिनींनी शालेय जीवनातील विविध खेळांचा खेळून बालपणीच्या आठवणींना पुन्हा उजाळा दिला आणि मनसोक्त आनंद लुटला.
मनोगत व आभार प्रदर्शन
स्नेहसंमेलन कार्यक्रमात डॉ. ज्योती वाढवे, घनश्याम बोखारे आणि परवेज यांनी आपले मनोगत व्यक्त करत जुन्या आठवणी आणि आजवरचा जीवनप्रवास यावर प्रकाश टाकला.
कार्यक्रमाचे प्रास्ताविक संतोष बोचकरी यांनी केले. सूत्रसंचालन डॉ. रमाकांत शातलवार व सुनील बागल यांनी अत्यंत अभ्यासपूर्ण व रंजक पद्धतीने केले. तर उपस्थित सर्वांचे आभार प्रदर्शन सुधीर मामीडवार यांनी मानले. हा मेळावा यशस्वी करण्यासाठी सर्वच माजी विद्यार्थ्यांनी परिश्रम घेतले.
छायाचित्र (फोटो): नागेश चव्हाण, वसमत.