🔴 वसमत हादरले! शेतकऱ्यांची छळवणूक करणाऱ्या ‘गिरगाव’ मंडळ अधिकाऱ्यावर निलंबनाची टांगती तलवार! ॲडव्हान्स पेरणीच्या तोंडावर भटके-विमुक्त समाजाच्या शेतकऱ्यांना उन्हात ताटकळत ठेवले; ‘अर्थपूर्ण’ शांततेमुळे महसूल वर्तुळात तीव्र संताप!

🔴 वसमत हादरले! शेतकऱ्यांची छळवणूक करणाऱ्या ‘गिरगाव’ मंडळ अधिकाऱ्यावर निलंबनाची टांगती तलवार!
ॲडव्हान्स पेरणीच्या तोंडावर भटके-विमुक्त समाजाच्या शेतकऱ्यांना उन्हात ताटकळत ठेवले; ‘अर्थपूर्ण’ शांततेमुळे महसूल वर्तुळात तीव्र संताप!

वसमत (प्रतिनिधी):

शासकीय आदेशाला ‘केराची टोपली’ दाखवत, अतिक्रमणधारकांशी संगनमत करून भटके-विमुक्त (VJNT) समाजातील गरीब शेतकऱ्यांना मानसिक त्रास देणाऱ्या गिरगावच्या मंडळ अधिकाऱ्याचा (सर्कल) मुजोर कारभार अखेर चव्हाट्यावर आला आहे. ऐन पेरणीच्या तोंडावर कण्हेरगाव येथील शेतकऱ्यांना उन्हात ताटकळत ठेवून शासकीय चौकशी टाळणाऱ्या या कर्तव्यात कसूर करणाऱ्या अधिकाऱ्यावर तात्काळ निलंबनाची कारवाई करा, अशी जोरदार मागणी भटके-विमुक्त समाज विकास उपविभाग स्तरीय समितीचे अशासकीय सदस्य मरिअन्ना नर्सिंगअन्ना वाघमारे यांनी उपविभागीय अधिकारी (SDO) यांच्याकडे एका लेखी निवेदनाद्वारे केली आहे. या प्रकरणाची तक्रार थेट महसूल मंत्री आणि इतर मागास बहुजन कल्याण मंत्र्यांपर्यंत पोहोचल्याने महसूल विभागात प्रचंड खळबळ उडाली आहे.
🛑 काय आहे नेमके प्रकरण?
मौजे कण्हेरगाव येथील गट क्र. १२३ मधील शेतात जाण्याचा जुना ‘पळसगाव-कण्हेरगाव रस्ता’/तसेच N.A झालेल्या रस्ता शेजाऱ्यांनी बेकायदेशीरपणे अडवला आहे. हक्काच्या रस्त्यासाठी मुख्य अर्जदार श्री. हरनामसिंग चव्हाण व इतर गरीब शेतकरी गेल्या अनेक दिवसांपासून प्रशासनाचे उंबरठे झिजवत आहेत. यावर मा. तहसीलदारांनी दि. ०८/०४/२०२६ रोजी स्पष्ट आदेश देऊनही गिरगाव मंडळ अधिकाऱ्यांनी दीड महिना कोणतीही पाहणी किंवा पंचनामा केला नाही. या दिरंगाईच्या मागे नेमके कोणते ‘अर्थपूर्ण’ गुपित दडले आहे? असा संतप्त सवाल आता उपस्थित केला जात आहे.
🔍 चौकशी टाळण्यासाठी ‘बालिश’ कारनामे!
तहसीलदार साहेबांच्या आदेशानुसार दि. ०४/०६/२०२६ रोजी सकाळी ११:०० वाजता जागेवर अधिकृत चौकशी निश्चित करण्यात आली होती. मात्र, अतिक्रमणधारकांना वाचवण्यासाठी मंडळ अधिकाऱ्यांनी एक नवीच चाल खेळली. अतिक्रमणधारकांना नोटीस पोहोचूच दिली नाही आणि ऐनवेळी “नोटीस मिळाली नाही” असे बालिश कारण पुढे करत चौकशीच रद्द केली.
कोतवालावर खापर फोडण्याचा प्रयत्न: स्वतःची कातडी वाचवण्यासाठी हे जबाबदार अधिकारी आता ‘कोतवालावर’ खापर फोडून मोकळे होत आहेत. एवढेच नव्हे तर हक्काचा रस्ता मागणाऱ्या मागासवर्गीय शेतकऱ्यांना न्याय देण्याऐवजी हे अधिकारी अरेरावीची भाषा वापरून त्यांना मानसिक त्रास देत असल्याचा गंभीर आरोप निवेदनात करण्यात आला आहे.
🌾 ऐन पेरणीच्या तोंडावर शेतकरी हवालदिल
एकिकडे पावसाळा तोंडावर आल्याने शेतकरी पेरणीच्या चिंतेत आहे. कडक उन्हात हे गरीब शेतकरी शेतात अधिकाऱ्यांची वाट पाहत ताटकळत राहिले, मात्र संबंधित जबाबदार अधिकारी फिरकलेच नाहीत. अधिकारी आणि अतिक्रमणधारकांचे उघड संगनमत असल्यामुळेच शेतकऱ्यांची ही विटंबना होत असल्याचे उघड झाले आहे.
🔥 ‘या’ मागण्यांसाठी मरिअन्ना वाघमारे आक्रमक:
तात्काळ निलंबन: शासकीय आदेशाची पायमल्ली करणाऱ्या आणि मागासवर्गीय शेतकऱ्यांना त्रास देणाऱ्या संबंधित मंडळ अधिकारी (गिरगाव) आणि तलाठी यांच्यावर तात्काळ कडक निलंबनाची कारवाई व्हावी.
त्रयस्थ चौकशी: संबंधित अधिकाऱ्यांवर विश्वास उरला नसल्याने, या प्रकरणाच्या चौकशीसाठी दुसऱ्या त्रयस्थ अधिकाऱ्याची नेमणूक करण्यात यावी.
रस्ता मोकळा करा: शेतकऱ्यांना तात्काळ शेत रस्ता मोकळा करून देऊन न्याय मिळवून द्यावा.
⚠️ …अन्यथा तीव्र आंदोलन छेडणार!
या प्रकरणाची गांभीर्याने दखल घेत मरिअन्ना वाघमारे यांनी थेट महसूल मंत्री, इतर मागास बहुजन कल्याण मंत्री (मंत्रालय, मुंबई), विभागीय आयुक्त (छत्रपती संभाजीनगर) आणि जिल्हाधिकारी (हिंगोली) यांच्याकडेही या भ्रष्ट कारभाराचे पुरावे पाठवले आहेत. “शेतकऱ्यांना तात्काळ न्याय मिळाला नाही तर प्रशासनाविरुद्ध तीव्र आंदोलन छेडण्यात येईल आणि याच्या परिणामांची संपूर्ण जबाबदारी प्रशासनाची राहील,” असा कडक इशारा वाघमारे यांनी दिला आहे. यामुळे आता उपविभागीय अधिकारी (SDO) या मुजोर अधिकाऱ्यांवर काय कारवाई करतात, याकडे संपूर्ण तालुक्याचे लक्ष लागले आहे.