🚨 वसमत CT NEWS: थेट इम्पॅक्ट! 🚨 तहसीलदारांच्या आदेशाला केराची टोपली दाखवणारे गिरगावचे मंडळ अधिकारी अडचणीत! उपविभागीय अधिकाऱ्यांचे (SDO) प्रशासकीय कारवाईचे आदेश

🚨 वसमत CT NEWS: थेट इम्पॅक्ट! 🚨
तहसीलदारांच्या आदेशाला केराची टोपली दाखवणारे गिरगावचे मंडळ अधिकारी अडचणीत! उपविभागीय अधिकाऱ्यांचे (SDO) प्रशासकीय कारवाईचे आदेश

वसमत (विशेष प्रतिनिधी):
शासकीय आदेशांचे उल्लंघन करणे आणि शेतकऱ्यांच्या समस्येकडे दुर्लक्ष करून कर्तव्यात हलगर्जीपणा करणे गिरगाव येथील मंडळ अधिकाऱ्यांना (सर्कल ऑफिसर) चांगलेच महागात पडणार आहे. कन्हेर्गाव (ता. वसमत) येथील शेतकऱ्यांचा वर्षानुवर्षांचा जुना रस्ता बेकायदेशीरपणे अडवल्याप्रकरणी तहसीलदारांनी स्पष्ट आदेश देऊनही रस्त्याची पाहणी व पंचनामा न करणाऱ्या गिरगावच्या मंडळ अधिकाऱ्यावर कडक प्रशासकीय कारवाई करण्याचे लेखी आदेश वसमतचे उपविभागीय अधिकारी (SDO) विकास माने यांनी दिले आहेत.
सामाजिक कार्यकर्ते हरनामसिंग सुभाषसिंग चौहान आणि त्रस्त शेतकऱ्यांनी प्रशासकीय दिरंगाईविरुद्ध पुकारलेल्या या कायदेशीर लढ्याला मोठे यश आले आहे.
नेमके काय आहे प्रकरण?
मौजे कन्हेर्गाव (ता. वसमत) येथील गट नंबर १२३ मधील शेतात जाण्या-येण्याचा पारंपरिक व वर्षानुवर्षांचा जुना रस्ता शेजाऱ्यांनी बेकायदेशीरपणे अडवून ठेवला आहे. यामुळे शेतकऱ्यांना आपल्या स्वतःच्या शेतात जाणे-येणे करणे अशक्य झाले होते, पर्यायाने शेतीची कामे ठप्प पडली होती. या त्रासाविरुद्ध हरनामसिंग चौहान व इतर शेतकऱ्यांनी वसमत तहसीलदारांकडे रस्ता मोकळा करून देण्याबाबत रीतसर दाद मागितली होती.
तहसीलदार, वसमत यांनी या अर्जाची गंभीर दखल घेत गिरगावच्या मंडळ अधिकाऱ्यांना तात्काळ घटनास्थळाची पाहणी करून रीतसर पंचनामा सादर करण्याचे स्पष्ट आदेश दिले होते. मात्र, वरिष्ठांच्या आदेशाला साफ डावलत मंडळ अधिकाऱ्यांनी ना रस्त्याची पाहणी केली, ना पंचनामा केला. महसूल विभागाच्या या कामचुकार आणि ढिसाळ कारभारामुळे शेतकरी कित्येक दिवस न्यायाच्या प्रतीक्षेत राहिले.
उपविभागीय अधिकाऱ्यांचा (SDO) थेट दणका!
मंडळ अधिकाऱ्यांच्या या मनमानी आणि वेळकाढू धोरणामुळे त्रस्त झालेल्या अर्जदार हरनामसिंग चौहान यांनी थेट उपविभागीय अधिकारी (SDO) कार्यालय गाठले आणि २० मे २०२६ रोजी लेखी तक्रार दाखल केली. या तक्रारीची गंभीर दखल घेत उपविभागीय अधिकारी विकास माने यांनी २१ मे २०२६ रोजी (जा.क्र. २०२६/आरओआर/ए/कावी – २३६) तहसीलदार वसमत यांना कडक पत्र जारी केले.
पत्रातील मुख्य आदेश:
1. मंडळ अधिकाऱ्यावर कारवाई: तहसीलदारांच्या स्पष्ट आदेशानंतरही पाहणी व पंचनामा न करता कर्तव्यात कसूर करणाऱ्या गिरगावच्या मंडळ अधिकाऱ्यावर तातडीने प्रशासकीय कारवाई करावी.
2. रस्ता मोकळा करा: कन्हेर्गाव येथील गट नंबर १२३ मधील अडवलेला पारंपरिक रस्ता कायद्यानुसार तात्काळ मोकळा करून शेतकऱ्यांना दिलासा द्यावा.
3. अहवाल सादर करा: आपल्या स्तरावरून या संपूर्ण प्रकरणाची सखोल चौकशी करून नियमाप्रमाणे पुढील कायदेशीर कारवाई करावी आणि केलेल्या कारवाईबाबत अर्जदारांना व SDO कार्यालयाला तात्काळ अवगत करावे.
प्रशासनात खळबळबळ; तालुक्याचे लक्ष!
सामान्य शेतकऱ्यांच्या हक्कासाठी आणि शासकीय यंत्रणेतील बेजबाबदारपणाविरुद्ध हरनामसिंग चौहान यांनी घेतलेल्या आक्रमक भूमिकेमुळे अखेर उपविभागीय अधिकाऱ्यांनी हा मोठा दणका दिला आहे. SDO यांच्या या कडक पत्रानंतर आता वसमत महसूल प्रशासन त्या कामचुकार मंडळ अधिकाऱ्यावर काय कारवाई करते आणि शेतकऱ्यांचा हक्काचा रस्ता कधी मोकळा होतो, याकडे संपूर्ण वसमत तालुक्याचे लक्ष लागले आहे.
— वसमत CT NEWS
(सत्य आणि रोखठोक बातम्यांसाठी पाहत राहा)