वचनपूर्ती! पारडी खुर्द येथील शेतकऱ्यांचा पांदण रस्त्याचा अनेक वर्षांचा प्रश्न मार्गी; आमदार राजूभैया नवघरे यांच्याकडून कामाचा धडाका

संपादक हरनामसिंग चव्हाण

0 1 1 minute read

वसमत (प्रतिनिधी):
निवडणुकीच्या काळात दिलेला शब्द पाळत वसमत विधानसभेचे आमदार राजूभैया नवघरे यांनी पारडी खुर्द येथील शेतकऱ्यांची अनेक वर्षांची अडचण दूर केली आहे. परिसरातील अत्यंत महत्त्वाचा आणि प्रदीर्घ काळापासून प्रलंबित असलेला कैलास नरवाडे (शेत) ते एम.एस.ई.बी. पांदण रस्ता अखेर मंजूर होऊन या रस्त्याच्या कामाला अत्यंत जलद गतीने सुरुवात झाली आहे. सध्या या रस्त्याचे मातीकाम पूर्ण झाले असून, शेतकऱ्यांनी आमदार नवघरे यांचे मनःपूर्वक आभार मानले आहेत.
शेतकऱ्यांना मोठा दिलासा
पारडी खुर्द परिसरातील शेतकरी बांधवांना शेतात ये-जा करण्यासाठी आणि शेतीमाल बाजारात वाहून नेण्यासाठी अनेक वर्षांपासून कच्च्या व खड्डेमय रस्त्यामुळे मोठ्या अडचणींचा सामना करावा लागत होता. विशेषतः पावसाळ्यात या भागात चिखलाचे साम्राज्य निर्माण होत असल्याने शेतकऱ्यांचे मोठे नुकसान होत होते. हीच समस्या लक्षात घेऊन आमदार राजूभैया नवघरे यांनी निवडणूक काळात हा रस्ता प्राधान्याने पूर्ण करण्याचे आश्वासन दिले होते. त्यानुसार त्यांनी तात्काळ निधी मंजूर करून प्रत्यक्ष कामाला गती दिली आहे.
पावसाळ्यानंतर इतरही रस्त्यांची कामे सुरू होणार
या पांदण रस्त्याचे मातीकाम पूर्ण झाले असून, आगामी काळात परिसरातील इतरही उर्वरित रस्ते मंजूर करण्यात येतील, असा शब्द आमदार साहेबांनी ग्रामस्थांना दिला आहे. तसेच, या दुसऱ्या टप्प्यातील रस्त्यांच्या प्रत्यक्ष कामाला पावसाळ्यानंतर लगेचच सुरुवात करण्यात येणार असल्याचेही त्यांनी स्पष्ट केले आहे.
परिसरात समाधानाचे वातावरण
कित्येक वर्षांपासूनचा हा जिव्हाळ्याचा प्रश्न सुटल्यामुळे पारडी खुर्द परिसरातील शेतकरी बांधवांनी अत्यंत समाधान व्यक्त केले आहे. “शब्दाला जागणारे नेतृत्व म्हणजे राजूभैया नवघरे साहेब!” अशा भावना व्यक्त करत परिसरातील शेतकऱ्यांनी आमदार साहेबांचे जाहीर आभार मानले आहेत.