श्री सिद्धेश्वर विद्यालयात ‘शाळा प्रवेशोत्सव’ उत्साहात संपन्न; गुणवंत विद्यार्थ्यांचा पालकांसह सत्कार!

1. श्री सिद्धेश्वर विद्यालयात ‘शाळा प्रवेशोत्सव’ उत्साहात संपन्न; गुणवंत विद्यार्थ्यांचा पालकांसह सत्कार!

वसमत (प्रतिनिधी):
स्थानिक श्री सिद्धेश्वर विद्यालय, वसमत येथे नवीन शैक्षणिक वर्ष २०२६-२७ चा पहिला दिवस ‘शाळा प्रवेशोत्सव’ म्हणून अत्यंत उत्साहात आणि आनंदी वातावरणात साजरा करण्यात आला. पहिल्याच दिवशी शाळेत पाऊल ठेवणाऱ्या विद्यार्थ्यांचे स्वागत फुलांचे गुच्छ देऊन करण्यात आले, ज्यामुळे विद्यार्थ्यांच्या चेहऱ्यावर एक वेगळाच आनंद पाहायला मिळाला.
या कार्यक्रमाच्या अध्यक्षस्थानी राजाभाऊ कापुसकरी हे होते. तर प्रमुख पाहुणे म्हणून शाळा समितीचे सदस्य श्री. मन्मथ आप्पा बेले आणि विद्यालयाचे मुख्याध्यापक श्री. कांबळे सर उपस्थित होते. याप्रकरणी पालक प्रतिनिधी देवराव मगर, निवृत्त शिक्षक श्री. भालेराव सर, प्रकाश इंगळे सर, शास्त्री सर, लंकलवाड सर आणि मन्हाळे सर यांची देखील सन्माननीय उपस्थिती होती.
गुणवंतांचे कौतुक आणि यशोगाथा
कार्यक्रमाचे मुख्य आकर्षण म्हणजे विद्यालयातील गुणवंत विद्यार्थ्यांचा झालेला भव्य सत्कार. मार्च २०२५-२६ च्या एस.एस.सी. (१० वी) परीक्षेत घवघवीत यश संपादन केलेले विद्यार्थी, एन.एम.एम.एस. (NMMS) परीक्षेत उत्तीर्ण झालेले तसेच स्कॉलरशिप (शिष्यवृत्ती) पात्र ठरलेल्या विद्यार्थ्यांचा त्यांच्या पालकांसह जाहीर सत्कार करण्यात आला.
यासोबतच विद्यालयाचे माजी विद्यार्थी ज्यांनी विविध क्षेत्रांत यश मिळवून शाळेचे नाव उज्ज्वल केले आहे, अशा यशस्वी तरुणांचाही विद्यालयाच्या वतीने विशेष गौरव करण्यात आला. यामध्ये:
सीए (CA) आदेश मगर
मन्मथ पटवे (महापारेषण मध्ये निवड)
जगदीश कलंदर (टेक्निशियन पदावर निवड)
या सर्व यशस्वी रत्नांना विद्यालयाच्या वतीने शाल, श्रीफळ आणि पुष्पगुच्छ देऊन सन्मानित करण्यात आले व त्यांच्या पुढील वाटचालीस शुभेच्छा देण्यात आल्या.
शिक्षक वृंदाचे परिश्रम
हा सोहळा यशस्वीरित्या पार पाडण्यासाठी विद्यालयाचे मुख्याध्यापक श्री. कांबळे सर यांच्या मार्गदर्शनाखाली सर्व शिक्षक आणि शिक्षकेतर कर्मचाऱ्यांनी अथक परिश्रम घेतले.
कार्यक्रमाचे नेटके आणि सुंदर सूत्रसंचालन श्रीमती कापसे मॅडम व श्रीमती शिवणकर मॅडम यांनी केले. तर उपस्थितांचे आभार श्री. क्षीरसागर सर यांनी मानले. या कार्यक्रमाला विद्यार्थी आणि पालक मोठ्या संख्येने उपस्थित होते.
छाया: नागेश चव्हाण, वसमत.