वसमत बसस्थानकावर प्रवाशांचे हाल; मुख्य शौचालयाला कुलूप, शेकडो महिलांसमोर पुरुषांचे उघड्यावर शौच!

वसमत बसस्थानकावर प्रवाशांचे हाल; मुख्य शौचालयाला कुलूप, शेकडो महिलांसमोर पुरुषांचे उघड्यावर शौच!

वसमत:
एकीकडे देशात ‘स्वच्छ भारत अभियाना’च्या मोठ्या-मोठ्या घोषणा दिल्या जातात, कोट्यवधी रुपयांचा निधी कागदावर खर्च केला जातो. पण दुसरीकडे, वसमत बसस्थानकावर मात्र याच अभियानाचा अक्षरशः कचरा झाला असल्याचं भीषण वास्तव समोर आलं आहे. गेल्या काही दिवसांपासून वसमत बसस्थानकातील मुख्य शौचालय कुलूपबंद अवस्थेत असल्याने प्रवाशांना, विशेषतः महिला आणि विद्यार्थिनींना नरकयातना सहन कराव्या लागत आहेत.
प्रशासनाच्या या ढिसाळ कारभारामुळे बसस्थानक परिसरात संतापजनक आणि लाजिरवाणी परिस्थिती निर्माण झाली आहे.
लज्जास्पद! शेकडो महिलांसमोर उघड्यावर शौच करण्याची वेळ
शौचालय बंद असल्याने सर्वात मोठा फटका महिला प्रवाशांना बसत आहे. तासनतास प्रवासाचा थकवा सोसून आलेल्या भगिनी, लहान मुले आणि ज्येष्ठ नागरिकांना नैसर्गिक विधीसाठी कुठे जावे, असा गंभीर प्रश्न निर्माण झाला आहे.
हळहळ आणि संताप: बसस्थानक परिसरात शेकडो महिला आणि विद्यार्थिनी उभ्या असताना, नाइलाजास्तव पुरुषांना आजूबाजूला उघड्यावरच विधी उरकावा लागत आहे. हे अत्यंत लज्जास्पद आणि संतापजनक चित्र आज वसमत बसस्थानकावर पाहायला मिळत आहे. या प्रकारामुळे महिलांना प्रचंड मनस्ताप सहन करावा लागत असून त्यांना मान खाली घालावी लागत आहे.
हजारो विद्यार्थी-विद्यार्थिनींच्या आरोग्याशी खेळ
वसमत हे शैक्षणिक केंद्र असल्याने दररोज हजारो विद्यार्थी आणि विद्यार्थिनी शाळा-कॉलेजसाठी या बसस्थानकाचा वापर करतात. मात्र, शौचालय बंद असल्याने आणि परिसरात पसरलेल्या प्रचंड दुर्गंधीमुळे विद्यार्थ्यांच्या आरोग्याचा प्रश्न ऐरणीवर आला आहे. एसटी महामंडळ विद्यार्थ्यांकडून पासाचे पैसे वसूल करते, पण त्यांना किमान मूलभूत सुविधाही देऊ शकत नाही का? असा तिखट सवाल आता नागरिक विचारत आहेत.
प्रशासनाचा ढिसाळ कारभार नक्की कोणाच्या आशीर्वादाने?
प्रवाशांकडून तिकिटाचे पूर्ण पैसे वसूल करणारे एसटी महामंडळ एवढे हतबल झाले आहे का, की त्यांना एक शौचालय नीट चालवता येत नाही?
दुर्गंधीचे साम्राज्य: शौचालय बंद असल्यामुळे संपूर्ण बसस्थानक परिसरात घाणीचे साम्राज्य पसरले असून डासांचा प्रादुर्भाव वाढला आहे.
डोळेझाक का?: या गंभीर समस्येकडे स्थानिक लोकप्रतिनिधी आणि संबंधित प्रशासन जाणीवपूर्वक डोळेझाक करत आहे का? असा प्रश्न आता वसमतकर विचारत आहेत.
आता वसमतकरांचा एकच सवाल: कुलूप कधी उघडणार?
या बंद शौचालयाचे कुलूप कधी उघडणार आणि महिलांची या नरकयातनेतून कधी सुटका होणार? याकडेच आता सर्वांचे लक्ष लागले आहे. जर प्रशासनाने तात्काळ हे शौचालय सुरू केले नाही, तर प्रवाशांच्या आणि विद्यार्थ्यांच्या तीव्र आंदोलनाचा सामना करावा लागेल, असा इशारा आता जनतेमधून दिला जात आहे.
पहा आमच्या प्रतिनिधीने थेट वसमत बसस्थानकावरून आणलेला हा खळबळजनक ग्राऊंड रिपोर्ट…