वसमत/ रामु चव्हाण
मूल्यशिक्षणाचा दीप, समाजाची जाणीव आणि पत्रकारितेचा प्रगल्भ आवाज
रामपुरी येथील सुपुत्र व लाल बहादूर शास्त्री विद्यालय, वसमत येथे कार्यरत शिक्षक संतोष रामकिशन राऊत यांना दैनिक अहिल्याराज द्वारे आयोजित ‘इंडियन एक्सलन्स अवॉर्ड 2025’ साठी निवड करण्यात आली आहे. महाराष्ट्र व मध्य प्रदेशातील दोन्ही राज्यांमध्ये प्रसिध्द असलेल्या या द्विभाषिक वृत्तपत्राच्या वतीने, त्यांच्या सामाजिक, शैक्षणिक व पत्रकारितेतील उल्लेखनीय कार्यासाठी हा पुरस्कार १ जून २०२५ रोजी मलकापूर येथील भातृ मंडळ हॉलमध्ये सन्मानपूर्वक प्रदान केला जाणार आहे.
संतोष राऊत हे केवळ शिक्षक नाहीत, तर एक सामाजिक विचारवंत, संवेदनशील पत्रकार आणि साहित्यिकही आहेत. ग्रामीण भागातील विद्यार्थ्यांना शिक्षणाची गुणवत्ता आणि मूल्यांचे महत्त्व शिकवण्यासोबतच त्यांनी लेखनातून समाजातील वेदना, समस्या व आशा मांडण्याचे कार्य केले आहे. त्यांची पत्रकारितेमुळे सामाजिक प्रबोधनाला नवे वळण मिळाले असून, त्यांच्या लेखणीला ग्रामीण भागाचा स्वाभिमान आणि न्याय यांचा आवाज सापडतो.
‘इंडियन एक्सलन्स अवॉर्ड’ हा सामाजिक व शैक्षणिक क्षेत्रात उत्कृष्ट कार्य करणाऱ्या व्यक्तींना सन्मानित करण्याचा एक अत्यंत प्रतिष्ठित पुरस्कार आहे. या पुरस्काराद्वारे विविध क्षेत्रांतील कर्तृत्ववान लोकांचा गौरव करण्यात येतो — ज्यात शिक्षण, साहित्य, पत्रकारिता, कला, आरोग्य, महिला सक्षमीकरण, सहकार, विधी सेवा, खेळ इत्यादींचा समावेश आहे.
संतोष राऊत यांचा हा सन्मान म्हणजे केवळ त्यांच्या वैयक्तिक कर्तृत्वाचा नाही, तर लाल बहादूर शास्त्री विद्यालय, वसमत या संस्थेचा आणि संपूर्ण परिभारक समाजाचा अभिमान आहे. त्यांच्या कार्यामुळे प्रेरणा घेऊन पुढील पिढीला उज्ज्वल भवितव्याची वाटचाल करता येईल.
