वसमत येथील उपजिल्हा रुग्णालयास आरोग्य सेवा लातूर मंडळाच्या उपसंचालिका डॉ. कांचन वानेरे यांनी भेट देऊन पाहणी केली. या दौऱ्यादरम्यान रिपब्लिकन पार्टी ऑफ इंडिया (आठवले गट) कामगार आघाडीचे मराठवाडा अध्यक्ष कैलास निकालजे यांनी जिल्हा रुग्णालय व अधिनस्थ रुग्णालयातील विविध समस्यांबाबत डॉ. वानेरे यांची भेट घेऊन त्यांना मागण्यांचे निवेदन दिले.
स्वच्छता सेवा आणि एजन्सीवर कारवाईची मागणी
निवेदनात प्रामुख्याने जिल्हा रुग्णालय आणि इतर रुग्णालयांमध्ये असलेल्या स्वच्छता सेवेबाबत तीव्र नाराजी व्यक्त करण्यात आली आहे. स्वच्छता कामाचा कंत्राट असलेल्या ‘साई एजन्सी’चे किरण जगताप यांच्या कामकाजाची चौकशी करून त्यांच्यावर तातडीने कठोर कारवाई करण्यात यावी, अशी मागणी कैलास निकालजे यांनी यावेळी केली. रुग्णालयातील स्वच्छतेचा दर्जा खालावल्याने रुग्णांच्या आरोग्याचा प्रश्न निर्माण होत असल्याचे त्यांनी निदर्शनास आणून दिले.
ETP व STP प्रकल्प कार्यान्वित करा
वसमत उपजिल्हा रुग्णालयातील सांडपाणी व्यवस्थापनासाठी अत्यंत आवश्यक असलेले ETP (Effluent Treatment Plant) आणि STP (Sewage Treatment Plant) अद्याप पूर्ण क्षमतेने सुरू झालेले नाहीत. हे प्रकल्प तातडीने कार्यान्वित करून रुग्णालयातील प्रदूषणाची समस्या निकाली काढावी, यावरही चर्चा करण्यात आली.
रुग्णालय प्रशासनाची उपस्थिती
या पाहणी दौऱ्यावेळी उपजिल्हा रुग्णालयातील वैद्यकीय अधिकारी, परिचारिका आणि कर्मचारी मोठ्या संख्येने उपस्थित होते. डॉ. वानेरे यांनी रुग्णालयातील विविध विभागांची पाहणी करून आरोग्य सेवांचा आढावा घेतला. मांडण्यात आलेल्या तक्रारी आणि मागण्यांवर सकारात्मक विचार करून योग्य ती कारवाई करण्याचे आश्वासन यावेळी प्रशासनाकडून देण्यात आले.
याप्रसंगी रिपाईचे पदाधिकारी, कार्यकर्ते आणि आरोग्य विभागाचे अधिकारी उपस्थित होते.
छाया नागेश चव्हाण, वसमत.
