वसमतमध्ये नैसर्गिक नाला बुजवून बेकायदेशीर प्लॉटिंग; पावसाळ्यात वस्त्यांमध्ये पाणी शिरण्याची भीती, नागरिकांचा आंदोलनाचा इशारा

वसमतमध्ये नैसर्गिक नाला बुजवून बेकायदेशीर प्लॉटिंग; पावसाळ्यात वस्त्यांमध्ये पाणी शिरण्याची भीती, नागरिकांचा आंदोलनाचा इशारा

वसमत (प्रतिनिधी): रामु चव्हाण

वसमत शहरातील कारखाना रोड, नवीन बसस्थानक आणि त्यामागील परिसरातील नैसर्गिक नाला बुजवून काही व्यक्तींकडून अनधिकृतपणे प्लॉटिंग (प्लॉट पाडणे) सुरू असल्याचा धक्कादायक प्रकार समोर आला आहे. सर्व्हे नं. ११७ मधून वाहणारा हा नैसर्गिक नाला बंद केल्यामुळे आगामी पावसाळ्यात शांताई नगर, महालक्ष्मी नगर, गुरुकृपा नगर, दामोधर नगर आणि द्वारकानगरी या परिसरातील शेकडो नागरिकांच्या घरात पाणी शिरून मोठे नुकसान होण्याची भीती निर्माण झाली आहे. या गंभीर समस्येकडे प्रशासनाने तातडीने लक्ष न दिल्यास तीव्र आंदोलन करण्याचा इशारा स्थानिक संतप्त नागरिकांनी दिला आहे.
नेमकी काय आहे समस्या?
कारखाना रोड आणि नवीन बसस्थानक परिसरातील वस्त्यांमधील सांडपाणी व पावसाचे पाणी नैसर्गिक उतारामुळे सर्व्हे नं. ११७ मधील नाल्यातून पुढे वाहून जाते. मात्र, सद्यस्थितीत परिसरातील काही भूमाफियांनी या नैसर्गिक नाल्याच्या पात्रातच माती व मुरुम टाकून तो प्रवाह पूर्णपणे बंद केला आहे आणि तिथे अनधिकृत प्लॉटिंग सुरू केले आहे.
पावसाळा तोंडावर आलेला असतानाच पाण्याचा हा नैसर्गिक मार्ग बंद झाल्यामुळे परिसरातील सर्व पाणी जागच्या जागी साचून राहील. त्यामुळे संपूर्ण वस्त्या जलमय होऊन नागरिकांचे आर्थिक व जीवित नुकसान होऊ शकते, तसेच साचलेल्या घाण पाण्यामुळे डेंग्यू, मलेरिया यांसारख्या साथीच्या रोगांचा प्रादुर्भाव वाढून नागरिकांचे आरोग्य धोक्यात येण्याची दाट शक्यता निर्माण झाली आहे.
प्रशासनाचे दुर्लक्ष आणि नागरिकांचा संताप
या गंभीर विषयाबाबत स्थानिक रहिवाशांनी यापूर्वीही नगर परिषद प्रशासनाला लेखी निवेदन दिले होते, मात्र त्यावर कोणतीही ठोस कारवाई करण्यात आली नाही. धक्कादायक बाब म्हणजे, संबंधित प्लॉट विक्रेते हे वसमत तहसील कार्यालय किंवा नगर रचना विभाग (हिंगोली) यांच्याकडून या अनधिकृत प्लॉटिंगला नियमित (मंजूर) करून घेण्याच्या तयारीत आहेत. त्यामुळे नागरिकांमध्ये प्रशासनाविरोधी तीव्र संताप व्यक्त होत आहे.
मुख्याधिकार्‍यांकडे दाद; आमदारांसह जिल्हाधिकार्‍यांना प्रतिलिपी
परिस्थितीचे गांभीर्य ओळखून परिसरातील सर्व नागरिकांच्या वतीने वसमत नगर परिषदेचे मा. मुख्याधिकारी साहेब यांना दि. १६ जून २०२६ रोजी पुन्हा एक सविस्तर तक्रार अर्ज सादर करण्यात आला आहे. या पत्रात नागरिकांनी खालील मागण्या केल्या आहेत:
* सर्व्हे नं. ११७ मधील आणि परिसरातील अनधिकृत प्लॉटिंग तात्काळ थांबवावे.
नैसर्गिक नाल्याचा प्रवाह पूर्ववत करून पाण्याचा निचरा होण्याची कायमस्वरूपी व्यवस्था करावी.
संबंधित प्लॉटधारकांनी नाल्याची योग्य पर्यायी व्यवस्था केल्याशिवाय त्यांच्या कोणत्याही ले-आऊटला (Layout) मंजुरी देण्यात येऊ नये.
या अर्जाची गांभीर्याने दखल घेतली जावी म्हणून याच्या प्रतिलिपी वसमत विधानसभा मतदारसंघाचे आमदार मा. चंद्रकांत ऊर्फ राजू भैय्या नवघरे साहेब, हिंगोलीचे जिल्हाधिकारी साहेब, सहाय्यक नगर रचनाकार (हिंगोली), वसमतचे तहसीलदार साहेब आणि नगर परिषद नगराध्यक्ष यांनाही पाठवण्यात आल्या आहेत.
नाइलाजास्तव आंदोलनाचा मार्ग स्वीकारावा लागेल!
“प्रशासनाने तात्काळ या बेकायदेशीर प्लॉटिंगवर कारवाई करून नैसर्गिक नाला मोकळा करावा. जर प्रशासनाच्या दुर्लक्षामुळे या पावसाळ्यात आमच्या वस्त्यांमध्ये पाणी साचले आणि नागरिकांचे नुकसान झाले, तर आम्हाला नाइलाजास्तव तीव्र आंदोलन करावे लागेल आणि त्याची संपूर्ण जबाबदारी प्रशासनाची राहील,” असा इशारा शांताई नगर, महालक्ष्मी नगर, गुरुकृपा नगर आणि दामोधर नगरच्या सर्व नागरिकांनी दिला आहे.