पूल उभा… पण भराव कोसळला; अपघात होण्याचीच प्रशासन वाट पाहत आहे का? वाई–चोंडी बहीरोबा मार्ग मृत्यूचा सापळा; सार्वजनिक बांधकाम विभागाच्या भोंगळ कारभारावर प्रवाशांचा तीव्र संताप!

पूल उभा… पण भराव कोसळला; अपघात होण्याचीच प्रशासन वाट पाहत आहे का?
वाई–चोंडी बहीरोबा मार्ग मृत्यूचा सापळा; सार्वजनिक बांधकाम विभागाच्या भोंगळ कारभारावर प्रवाशांचा तीव्र संताप!

वसमत CT NEWS

वसमत तालुक्यातील वाई:
‘पूल उभा राहिला खरा, पण पहिल्याच पावसात त्याचा पायाच खचला!’ वाई–चोंडी बहीरोबा मार्गावरील मरसूळ पाटीजवळ नव्याने बांधण्यात आलेल्या पुलाची झालेली दुरवस्था पाहून सध्या वाहनधारकांच्या पोटात भीतीचा गोळा आला आहे. नव्याने बांधलेल्या या पुलाच्या दोन्ही बाजूंचा भराव मुसळधार पावसामुळे पूर्णपणे खचला असून, तिथे तब्बल माणसाएवढी मोठी भगदाडे पडली आहेत. या गंभीर परिस्थितीमुळे “प्रशासन एखाद्या मोठ्या अपघाताची आणि निष्पाप जीवांचा बळी जाण्याची वाट पाहत आहे का?” असा संतप्त सवाल आता स्थानिक नागरिक आणि प्रवासी विचारत आहेत.
पहिल्याच पावसात निकृष्ट दर्जा उघडा!
लाखो रुपये खर्चून मरसूळ पाटीजवळ हा नवा पूल उभारण्यात आला. पावसाळ्यात प्रवाशांचा प्रवास सुखकर होईल अशी अपेक्षा होती, मात्र पहिल्याच मोठ्या पावसाने सार्वजनिक बांधकाम विभागाच्या (PWD) कामाची पोलखोल केली आहे. पुलाला जोडणारा भराव वाहून गेल्याने पुलाची सुरक्षा धोक्यात आली आहे. रस्ता आणि पूल यांमधील संपर्क तुटण्याच्या स्थितीत असून, रात्री-अपरात्री प्रवास करणाऱ्या वाहनधारकांना या भगदाडांचा अंदाज येत नसल्याने येथे कधीही मोठा अपघात घडू शकतो.
प्रवासी आणि वाहनधारक चिंतेच्या छायेत
या मार्गावरून दररोज शेकडो लहान-मोठी वाहने, शाळकरी मुले आणि ग्रामस्थ ये-जा करत असतात. भराव खचल्यामुळे वाहतुकीसाठी रस्ता अरुंद आणि धोकादायक बनला आहे. ऐन पावसाळ्यात ही अवस्था असल्याने वाहतूक पूर्णपणे ठप्प होण्याची किंवा एखादे वाहन थेट या भगदाडात कोसळण्याची दाट शक्यता निर्माण झाली आहे. या धोकादायक परिस्थितीमुळे या मार्गावरून प्रवास करणारा प्रत्येक जण सध्या जीव मुठीत धरूनच प्रवास करत आहे.
“नवा पूल बांधला म्हणून आम्ही खुश होतो, पण पहिल्याच पावसात पुलाचा भराव वाहून गेला. अधिकाऱ्यांनी एसी केबिनमधून बाहेर पडून जमिनीवर काय परिस्थिती आहे हे पाहावे. अपघात झाल्यावर जाग येणार आहे का?”
— एक संतप्त स्थानिक वाहनधारक
प्रशासनाला शेवटचा इशारा: तातडीने दुरुस्ती करा!
सार्वजनिक बांधकाम विभागाच्या संबंधित अधिकाऱ्यांनी एसी कार्यालयातून बाहेर पडून या निकृष्ट कामाची पाहणी करण्याची गरज आहे. या ठिकाणी तातडीने युद्धपातळीवर डागडुजी आणि मजबुतीकरण न केल्यास, एखादी मोठी दुर्घटना घडल्याशिवाय राहणार नाही, असा इशारा ग्रामस्थांनी दिला आहे.
आता तरी ढिम्म प्रशासन जागे होणार का? की नेहमीप्रमाणे दुर्घटना घडल्यावरच चौकशीचे सोंग घेणार? याकडे संपूर्ण तालुक्याचे लक्ष लागले आहे.